https://iks.bhu.edu.in/index.php?action=history&feed=atom&title=Sbg_3.24_scanand 2026-04-24T17:55:11Z Revision history for this page on the wiki MediaWiki 1.44.3 https://iks.bhu.edu.in/index.php?title=Sbg_3.24_scanand&diff=6310&oldid=prev 2025-12-03T12:14:47Z

<p>Added {content_identifier} content</p> <p><b>New page</b></p><div>Sanskrit Commentary By Sri Anandgiri<br /> ।।3.24।।श्रेष्ठस्य तव मार्गानुवर्तित्वं मनुष्याणामुचितमेवेत्याशङ्क्य दूषयति<br /> तथाचेत्यादिना।<br /> ईश्वरस्य कर्मण्यप्रवृत्तौ तदनुवर्तिनामपि कर्मानुपपत्तेरिति हेतुमाह<br /> लोकस्थितीति।<br /> इतश्चेश्वरेण कर्म कर्तव्यमित्याह<br /> किञ्चेति।<br /> यदि कर्म न कुर्यामिति शेषः। संकरकरणस्य कार्यं कथयति<br /> तेनेति।<br /> प्रजोपहतिः परिप्राप्यते चेत् किं तया तव स्यादिति तत्राह<br /> प्रजानामिति।<br /> त्वामनाचरन्तमनुवर्ततां सर्वेषां को दोषः स्यादित्यपेक्षायामीश्वरस्य कृतार्थतया कर्मानुष्ठानाभावे तदनुवर्तिनामपि तदभावादेव स्थितिहेत्वभावात्पृथिव्यादिभूतानां विनाशप्रसङ्गाद्वर्णाश्रमधर्मव्यवस्थानुपपत्तेश्चाधिकृतानां प्राणभृतां पापोपहतत्वप्रसङ्गात्परानुग्रहार्थं प्रवृत्तिरीश्वरस्येत्युक्तं संप्रति लोकसंग्रहाय कर्म कुर्वाणस्य कर्तृत्वाभिमानेन ज्ञानाभिभवे प्राप्ते प्रत्याह<br /> यदि पुनरिति।<br /> कृतार्थबुद्धित्वे हेतुमाह<br /> आत्मविदिति।<br /> यथावदात्मानमवगच्छत्कर्तृत्वाद्यभिमानाभावात्कृतार्थो भवत्येवेत्यर्थः। अर्जुनादन्यत्रापि ज्ञानवति कृतार्थबुद्धित्वं कर्तव्यत्वाद्यभिमानहीने तुल्यमित्याह<br /> अन्यो वेति।<br /> तस्य तर्हि कर्मानुष्ठानमफलत्वादनवकाशमित्याशङ्क्याह<br /> तस्यापीति।<br /> कर्तव्य इत्यात्मविदापि परानुग्रहाय कर्तव्यमेव कर्मेत्याहेति शेषः।</div>

imported>Vij