https://iks.bhu.edu.in/index.php?action=history&feed=atom&title=Sbg_14.27_scanand 2026-04-19T00:46:09Z Revision history for this page on the wiki MediaWiki 1.44.3 https://iks.bhu.edu.in/index.php?title=Sbg_14.27_scanand&diff=17734&oldid=prev 2025-12-04T09:47:12Z

<p>Added {content_identifier} content</p> <p><b>New page</b></p><div>Sanskrit Commentary By Sri Anandgiri<br /> ।।14.27।।विद्वान् ब्रह्मैवेत्यत्र हेतुं पृच्छति --<br /> कुत इति।<br /> तत्रोत्तरमाह --<br /> उच्यत इति।<br /> ब्रह्मशब्दस्यासति बाधके मुख्यार्थग्रहणमभिप्रेत्याह --<br /> परमात्मन इति।<br /> तं प्रति प्रत्यगात्मनो यत्प्रतिष्ठात्वं तदुपपादयति --<br /> प्रतितिष्ठतीति।<br /> यद्ब्रह्म प्रत्यगात्मनि प्रतितिष्ठति तत्किंविशेषणमित्यपेक्षायामुक्तम् --<br /> अमृतस्येत्यादि।<br /> तत्रामृतशब्देनाव्ययशब्दस्य पुनरुक्तिं परिहरति --<br /> अविकारिण इति।<br /> नित्यत्वमपक्षयराहित्यं तेन पूर्वाभ्यामपौनरुक्त्यम्। प्रसिद्धार्थस्य धर्मशब्दस्य ब्रह्मण्यनुपपत्तिमाशङ्क्याह --<br /> ज्ञानेति।<br /> अर्थेन्द्रियसंबन्धोत्थं सुखं व्यावर्तयितुमैकान्तिकस्येत्युक्तम्। अक्षरार्थमुक्त्वा वाक्यार्थमाह --<br /> अमृतादीति।<br /> प्रतिष्ठा यस्मादिति पूर्वेण संबन्धः। तस्मात्प्रत्यगात्मा परमात्मतया निश्चीयते सम्यग्ज्ञानेनेति योजना। अस्य श्लोकस्य पूर्वश्लोकेनैकवाक्यतामाह --<br /> तदेतदिति।<br /> विवक्षितं वाक्यार्थं प्रपञ्चयति --<br /> ययेति।<br /> सा शक्तिर्ब्रह्मैवेति कथं सामानाधिकरण्यं तत्राह --<br /> शक्तीति।<br /> व्याख्यानान्तरमाह --<br /> अथवेति।<br /> विशेषणानि पूर्ववदपौनरुक्त्यानि नेतव्यानि। तदनेनाध्यायेन क्षेत्रक्षेत्रज्ञसंयोगस्य संसारकारणत्वं पञ्चप्रश्ननिरूपणद्वारेण च सम्यग्ज्ञानस्य सकलसंसारनिवर्तकत्वमित्येतदुपपादयता मुमुक्षोर्यत्नसाध्यं गुणैरचाल्यत्वादि मुक्तस्यायत्नसिद्धं लक्षणमिति निर्धारितम्।<br /> <br /> <br /> इति श्रीमत्परमहंसपरिव्राजकाचार्यश्रीमच्छुद्धानन्दपूज्यपादशिष्यानन्दगिरिकृतौचतुर्दशोऽध्यायः।।14।।</div>

imported>Vij